冇標題黨。篇文嘅結論就係沒有美斯，阿根廷連史浩克零四都不如。下面話你知點得出呢個結論。
美斯，美斯，又係美斯。雖然今年金球奬摩迪打破C朗同美斯嘅壟斷，但大家心知肚明，理唔理性都好，過去N咁多年球王之爭都係C朗同美斯。其他人只能夠爭第三，大家討論咗好耐第三係邊個，伊巴謙莫域／洛賓／尼馬／摩迪？但第一二係另一回事。
上次篇文（強烈建議你睇呢篇，或者睇原文）講過，美斯係近代（2006-2007）最出色嘅finisher，而且沒有之一。佢啲數字帶離其他人成條街。
而慎防有啲讀者唔熟我，我一定要講，作為捧拜仁同德國嘅球迷，我當然係唔鍾意美斯的。從來冇鍾意過。特別係2009年歐聯，廿一歲嘅美斯帶領巴塞首回合半場已經炒咗拜仁四蛋。
今次呢篇文係同一個作者，你睇佢名都知，係巴塞fans，但我不認為影響佢嘅判斷，始終係講實數。佢另外有文話你知美斯唔止係top finisher，仲係極出色 (if not the best)嘅盤球者及助攻王。簡單嚟講，無可爭議唯一嘅球王。而我係信服佢嘅講法。
Argentina without Messi: How strong are they?
It’s not a secret that, Messi aside, the current Argentina national team is not exceptional. There has always been some debate on this and the general consensus is that they have a lot of talent in attack while the rest of the team is “normal”. Since “normal” is not always easy to define, I tried…
但今次嘅重點係講阿根廷。美斯打從在巴塞獲得空前成功後，所有焦點都放晒在「踢阿根廷唔見你咁好波」。甚至去到質疑佢愛唔愛國嘅地步。再加埋其實唔識波（我話嘅）但口水多多，但你吹佢唔脹因為捧過世界盃嘅馬勒當拿加把口。打後咁多年，每一次阿根廷嘅世界盃，都係美粉同美黑開拖嘅時機。有人話阿根廷啲隊友好垃圾唔係美斯一早死咗（我傾向呢種講法，特別係你睇最近一屆嘅外圍賽），但亦有講話啲隊友全部（真係全部？）都名牌球會，四大神鋒，美斯阿古路戴巴拿希古恩，位位都獨當一面，有冇真係咁差（留意上次篇文）講，希古恩都係過去十年歐洲五大聯賽嘅top three finisher）。沒完沒了。慢慢演變成為文學創作，甚至有人當自己睇馬咁睇美斯嘅步頭，身體語言，眼神之類。點都係令我諗起「舒利亞帶住疲倦嘅身軀都入個世界波」。
任你話我唔識波。但，講科學嘛。況且篇文唔係我寫，要鬧去鬧佢。（話時話作者twitter寫嘅地點係Tiranë, Shqipëri——阿爾巴尼亞首都地拉拿。乜人嚟的？）
作者用嘅方法，就係睇下冇咗美斯嘅阿根廷，squad strength，大約等於歐洲咩球會嘅水平。講就易，做起上嚟都係有啲難。但唔係完全不可能。再講一次，數字當然有局限，但鍾意講「數字唔代表乜嘅」可以回家。
![]()
作者用嘅方法，同Financial Times一篇舊文好相似。咁啱我亦都睇過呢篇FT嘅文，仲有譯過。呢啲就係英雄所見略同，同埋英雄係畀錢買報紙嘅。冇畀錢嘅睇我嘅版本，留言有貼埋張圖。仁至義盡了。
簡單解下。一隊波嘅實力，就係所有球員實力加埋—即係冇考慮默契火花，或一齊出會有連携爭食開片之類，教練亦係廢嘅，完全冇計—但在國家隊應該比較OK。
球員實力點計呢？就計兩樣嘢。第一，球會實力。第二，上陣幾多分鐘。個原理係你在班霸球會擔正正選嘅，點都係好波（例如，達史迪根）。上陣幾多分鐘好易搵到數據，球會實力呢？就用Nate Silver （預測大師，不過畀侵侵跣咗）FiveThirtyEight網站嘅一個排名，SPI 。SPI個好處係佢唔止有排名，仲有個數字分數。例如呢刻曼城係93.9分，巴塞91.7分（未計對熱刺）。
類似嘅排名仲有其他，例如我年中講足幾個月嘅Elo Rating。反正出嚟結果大同小異，呢刻嘅頂級球會不離曼城，巴塞，利物浦（你冇睇錯），拜仁（你都冇睇錯）等等。一句，係可信嘅。
有佢地球會嘅SPI，有上陣時間，就將所有阿根廷球員整個圖。X軸（水平呀）上陣時間，Y軸（垂直）係球會上陣時間。咁當然越係右上角嘅（即係，美斯）越勁。在勁嘅球會踢足咁多場，點都係勁。
好啦，然後就試下，拎走美斯，睇下阿根廷嘅加權平均SPI（即係計晒球員球會嘅平均SPI，我相信權重係上陣時間），出嚟就係74.1。
74.1係咩水平？在作者寫果時（今年世界盃開頭），就係標題嗰句。史浩克零四都不如，同馬賽或艾巴（Eibar）差不多水平。而家呢一刻，74.1大約就係 德甲賀芬咸，意甲AC米蘭，或者西甲愛斯賓奴咁水平。咁你話阿根廷美斯其實係咩質地？
但，明明就話四大神鋒，冇咗美斯都好，希古恩阿古路戴巴拿都係頂級球會台柱喎。冇錯，佢三位係好高分的—亦基本上係全隊最高。剩返嗰班，係極之甩皮甩骨嘅。作者同你計埋，冇咗四大神鋒，阿根廷連（作者寫當時嘅）愛斯賓奴 貝迪斯都不如。而家呢，大約等於愛華頓咁水平。
結論好簡單：沒有美斯，阿根廷連史浩克都不如。冇埋阿古路希古恩戴巴拿（留意應該最多出兩件？），更加係愛斯賓奴都不如。換句話講，成班中場同後防，真係三四流水平。勉強得迪馬利亞（巴黎聖日門喎！），奧丹文迪（曼城嘛）同埋Fazio（羅馬）。其他一係踢啲雞會（美沙Meza踢阿根廷聯賽咋），一係就大會但冇乜機會出（洛荷，或者馬斯查蘭奴—留意馬斯查蘭奴出現咗兩次，因為年頭傳咗去中超，拖低系數……）
最尾又講個局限。當然我篇舊文已經提過種種局限。FT只計五大聯賽，但SPI係有埋南美會甚至有中超（但作者寫嗰時冇），呢個已經係改善。但你會見到巴西阿根廷聯賽嗰堆會相當低分，可能真係水平低？阿根廷嘅河床小保加，等於歐洲五大聯賽中下游水平咋。巴西好啲，但最叻一隊彭美利斯亦係史浩克都不如。南美球會係咪被低估，可以拗下
另外，你有球員如果傷咗好耐（例如紐亞在世界盃前咁），必然拖到個數好低。而講到尾足球踢十一個，往往都係十四五個。我十五個一線球員拖一堆垃圾，分數可能一樣，但踢落一定好過你廿三個二線。而其實阿根廷嘅case，你計正選嗰堆，好似都仲幾好嘅，係後備嗰堆拖到好低。
延伸閱讀，名家 Simon Kuper在世界盃前寫嘅：係阿根廷負了美斯，唔係美斯負了阿根廷，佢就唔係用好多數字（但都有），但結論一樣。題係我改的。冇錯，又係Financial Times，我又有譯。點解嗰時咁多時間又睇波又譯文仲可以返工呢可？
當然，要抽水嘅，我自抽先。呢類方法，就冇可能解釋到點解咁多主力係拜仁嘅德國咁早出局。
彩蛋：希望我冇睇漏，但作者好似冇講 有埋美斯嘅阿根廷又係咩水平。我唔夠數字，用quick and dirty嘅方法（即係，廿二個平均乘返廿二加返美斯再除廿三）計，應該係去到74.8左右。即係而家嘅法蘭克福咁上下。其實分別不大。講到尾，隊友真係唔夠班。前鋒還好，龍門後防中場得啖笑。
我在作者blog留咗言，睇佢會唔會覆。
作者 Facebook Page
