【長文講醫生註冊同內地醫生來港執業】
好多人話過左醫生註冊（修訂）條例二讀，就會引入內地醫生來港執業。
先講立法程序，過完二讀仲有全體委員會審議法案條文及三讀。正常拉布都會係全體委員會審議階段拉布，二讀每位議員得十五分鐘講野，而全體委員會審議有無限時間討論，我唔明大家點解覺得係要係二讀開始拉布。點解大家覺得泛民如投反對票會否決到二讀？如果覺得二讀投反對係否決到既，點解三讀投反對唔得？政治現實同我地講泛民無論係二讀定三讀投反對都係唔夠票否決。點解有泛民議員會係二讀投贊成又講明過唔到郭醫生既修正案就會於三讀反對，我相信有個別泛民議員已經清楚解釋原因係贊成改革醫委會既大方向，而喺全體委員會審議階段再慢慢同佢審條議案細文，利用郭醫生既修正案改成佢地認為理想既方案。
講到點解會有大陸醫生落黎香港執業，其實政府議案中所寫「便利非本地培訓醫生（特別是專科醫生）到港執業」是指有限度執業的註冊及續牌由1年變為3年。有限度註冊一直都存在，做過fact check，現時經醫管局有限度註冊的醫生只有13位，當中有否於國內受培訓的醫生就不得以之了。
除了有限度註冊之外，非本地培訓醫生要來港執業還有一個方法，就是考由醫委會主辦既執業資格試。我想有必要重申一點：是次修例不影響任何有關執業資格試的條文。不過認識多一點也沒壞處吧。現時執業資格試是由醫委會轄下執照組既考試小組負責監察該考試既整體運作，而考試籌辦同行政工作就由港大同中大承擔。執業資格試既各個部分都係由兩間大學提供總考試主任，而仲有海外人士做臨床考試既考試主任。執業資格試既試題由大學醫學院所委任既教學人員負責草擬，而醫委會轄下執照組既考試小組負責審核。大家驚醫委會唔知搵咩人黎做執照組轄下考試小組既成員？又再fact check一下，現時醫委會轄下執照組既考試小組既14名委員當中有13名都是兩間大學醫學院的老師。要所謂「放水」俾大陸醫生經此試來港執業，談何容易？我仲信兩間大學醫學院教授對維護醫生專業有一定信心。我想要再重申一次，是次修例並無對此執業資格試有任何既改動。
上面講左咁多，絕對唔係要為呢個法案護航，而只係想澄清番大陸醫生來港執業唔係大家所諗咁容易。大家不如都係聚焦番係點樣執好醫委會既委員組成、選舉及委任既比例同埋如何令特首不能操控醫委會。我諗呢個先係呢條法案既最主要重點。
By 一個唔鐘意民粹、有認真地睇過條bill先講野既小薯仔
資料來源：
1. 《2016年醫生註冊(修訂)條例草案》資料文件
2. CAP 161 醫生註冊條例
3. 醫務委員會二零一四年年報
4. 立法會三題：醫務委員會的執業資格試 (dated 27 Feb 2013)
（題為編輯所擬。）