網上圖片
有媽媽響的士餵母乳嘅片俾人擺上網單嘢，其實是非曲直好簡單，不過簡單唔代表一定人人都明，所以我都要人之患講幾句。
1. 車cam紀錄乘客嘅樣同言行，屬於紀錄個人私隱資料[1]，如非必要其實唔應該做，就算做，都必須要有告示，而且處理紀錄必須守個人資料(私隱)條例。呢單嘢好明顯冇告示，而且將紀錄放上網係嚴重侵犯個人私隱，違反私隱條例，最嚴重係可以有刑事責任 - 「未獲資料使用者授權而披露取自其持有的個人資料」（第64條）[2]。
2. 有人會話你班母親餵奶唔係成日話要光明正大咩？放上網又唔得呀？個道理等於你出街食飯，你食飯個樣同過程俾人放上網，你食飯光明正大，唔包括俾個場地負責人放上網，係咪？
3. 有人話的士唔係俾你餵奶嘅地方。的士可唔可以食嘢？(傳說中有指引叫乘客唔應該飲食，不過我搵第374D章 《道路交通(公共服務車輛)規例》 搵唔到法例禁止的士乘客飲食)，就算係其他不准飲食嘅公共交通工具，根本餵奶係唔受限制嘅，政府宣傳片都有巴士餵奶嘅片段。
4. 有人話點解啲人唔等得要周街餵奶？BB個胃好細，佢地天生要不停咁食痾瞓，人奶易消化吸收，所以好快肚餓，所以咪要成日餵，你估做媽媽嘅貪得意周街餵？
5. 有人話你呢個媽媽餵奶冇用餵奶巾遮住，咁樣個司機好尷尬，呢點我明，相機廣告都有云，男人對眼係世界對焦最快嘅鏡頭。喂阿哥，如果覺得尷尬，可以出聲，但唔係放上網。
6. 當然，有一個可能，就係放上網嘅人唔係個司機，可能係下一更司機、車主、公司職員, etc。唔緊要，如果調查發現唔係個司機，咁還佢一個清白，但應該追究放上網嘅人，有冇未經授權取走資料，已經有可能構成不誠實使用電腦，或者違反個人資料(私隱)條例「未獲資料使用者授權而披露取自其持有的個人資料」，總之必須追究。
7. 社會仲有部份人覺得公眾地方餵奶唔啱，呢樣野有賴做倡議嘅朋友繼續努力，令公眾（尤其是啲物業管理同啲影人嘅手痕友）明白餵奶天經地義，早幾十年前，女人餵奶本來都係好光明正大嘅事。呢幾十年因為餵奶嘅人少左，所以大家先至忘記咗餵奶本來係育兒嘅正常舉動。
講咗咁耐，都係希望呢件事可以令社會更加尊重餵奶媽媽嘅權益，更重要嘅係尊重佢地嘅付出。